Ni-js van ’t Nettelkörnke.

Door op in

Ni-js van ’t Nettelkörnke.

Nen tiedke leedn was ik wat ant rondvleegn toen ik miezulf bedacht dat ik dit joar de dree kearls nog helemoal nich har seen. Het lik wa of ze mie te slim of bint dit joar. As het mie mangs wat teegn zit, dan vleeg ik altied mear eavn noar ’t Sint Plechelmusplein noar mien beeltenis in brons op ’n hook met de Teussestroat. Gellukig bin ik t’r noe wa aan weand, mer de eerst paar moal dat ik noa de afgelopen carnavalsmis bie het beeldje kwam schrök ik mie de veern oet het lief. Steet doar toch ineens ’n Dwars’n Adelaar achter mien bronzen variant. Inmiddels bin ik t’r wa achter dat den Adelaar ’t allmoal nig zo slim meant. Mear ’t blif nen raren vogel. Mear good, toen ik dus lest doar was braandn d’r volop lecht bie Ria Bartels. En met dat ik dat zag kwam d’r nen donkeren auto anveurn met woarachtig dree bekende kearls. Soll ’t dan toch. En joa heur, de dree kearls stapt oet en heel snel loodsn dee dree kearls veer leu noar binn’n. Niemand heft het seen, behalve ik dan. Snel zeuk ik nen plekske woar ik nog net langs de gedienn kan kiekn. Want Ria hef het altied potdicht zittn as de ni-je hoogheden komt. Ik zee dat de twee kearls wat onwennig in de steekn zit te trekken. Wel solln Prins wean. Wocht eavn , ik deenk dat ik het wet. Ene van de twee probeert wat Prinsn jässe an. Dat zal dan de Prins wa wean. Oeh, den greun’n steet m wa good. Sien vrouw knikt en kan nen glimlach nig onderdrukn. Ik ken dit stel wa. Leuke leu. Leuke kinder ok. Wat he precies döt wet ik zo nig, mear het is ’n bezige bij.

Den andern kearl is nog drök ant trekken in de steekn van Ria. Sien vrouw pakt nen mooin blauw’n steek. He lik wa wat op de steek van de road van elf. Dat steet m woarachtig nog good ok. Ok dissn kearl ken ik wa. Mooi’n kearl. Den maak ie de kachel nig an. En ok hij hef nen leuke vrouw en volgens mie hebt ze ok wa keender.

Volgns mie bint ze d’r oet. Ze lacht wat en zee ik dat no good, bint ze de polonaise a ant oetprobeern. Het is hoast bie de beestn of, ze zet alles opn kop bie Ria. Een ding wet ik zeker. Disse kearls hoald wa van ’n feestje. Dus dat geet met’n carnaval wa good komn.

Dan maakt ze anstaltn um wier vot te goan. A net zo vlug at ze kwamn goat ze wier hen int donker. Ik vleeg ze nog eavn achternoa, mer het is mie te wied vot vandaag dus zeuk ik mien nust weer op.

Gelukkig dak eavn noar mien eavnbeeld bin vlögn. Aanders hak disse tekst ja heelmoal oet mien doem mutn zoegn. Dat zoll ok wat wean.

 

Het ni-jsgierige Nettelkörnke.

 

« »