Ni-js van ’t Nettelkörnke

Door op in

Ni-js van ’t Nettelkörnke

Roondvleeg’n in dorp mag ik geern doon. Zo zeej tenminste nog is wat. Veurig joar har ik doarmet onmeunig geluk. Toen hek de dree kearls betrapt bie Ria Bartels, mien beschermvrouwe. Dit joar is mie dat mis goan. Ria hef teegnwoordig ja sowat elkn oavnd het lech helderop an. Volgns mie geet t good met de zaakn. Mer ik heb ja geels gin tied um iedere dag bie Ria veur de deur de boel in gaatn te hoaln. Normaal vleeg ik dan meer wat deur het doorp mer no besloet ik m’r eens noar Gammelke hen te vleegn, doar woont ter ja één vant dreemanschap. Mear toen ik doar ankwam bleek dat den a met pensioen is goan. Beste kearl, mear no hef he mie mooi te pakken. Met dar ik ’n betke hellig inn kop werum wol vleegn noar ’t dorp vlug de wa nen heeln bekendn auto langs richting Weersel. Snel vleeg ik d’r achteran. Vlak veuran in Weersel geet het rechtsof en sloet dr twee auto’s an. Noa nen tiedke veurn stopt ze bie nen mooi grootn boerderiej. De dree kearls stapt oet en a snel komt dr veer leu achteran. Woar ken ik dee leu toch van. Ze nemt nog wat kroam met en goat rap noar binn hen. Ik zeuk mie rap nen goodn stier oet en kan alns binnen mooi volgn. Ik zeet a; zee goat foto’s maakn. De carnavalskleer komt veurn dag. Ik mut zegn de kearsl loop tr skier bie. Mooi peers is nig lilluk. De vrouwleu doot ter niks veur oonder trouwns. Ineens vlog ter nen bal deur de loch. Mer ze goat gewoon deur met foto’s maakn. Die leit de lat wa hoog doar. Het mut almoal perfect wean. At ze bienoa kloar bint goat ze nog vlug noar binn bie dames op stal, meer net veurdat ik good kan seen wat ze ant doon bint stoat ze a wier boetn. Ze schud de fotograaf de haand en stapt weer inn auto. Ik vleeg dr ma weer rap achteran. Halfweg schrik ik mie zowat ’n ongeluk. Vleeg ik toch bienoa hoog teegn nen drone an. Dee dingn mut ze dreks verbeedn. In’t dorp zee ik nog net op tied dak n probleem heb. Alle auto’s goat ’n ander kaant oet. Ik goa achter een van de auto’s an. Ze stopt veur n skier hoes en noadat ze naor binn hen bint goan komt dr nich vul later een ander noar boetn. De gedienn zit good dicht dus kaank niks zeen. Doorop vleeg ik meer wat wieder roond en ineens zee ik den andern auto weer veurn. Ok den auto stopt veur n skier hoes en net as bie den andern geet dr kort noadat ze binn bint weer één persoon vot. Ik vleeg mer eens terug noar mien nust. Onderweg bedenk ik mie dat ik disse kearls wa vaker bie de carnaval heb seen. Het dreemanschap hef ’t in ieder geval weer mooi terecht dit joar. Metn gerust geveul striek ik dan ok daal op mien nust.

Het ni-jsgierige Nettelkörnke.

« »